नेपालले भारतलाई निर्यात गर्न पाउने विद्युत क्षमतामा फेरि ८० मेगावाट थपिएको छ । भारत सरकारले नेपालका दुई जलविद्युत् आयोजनाबाट उत्पादन भएको विद्युत् खरिद गर्ने सहमति जनाएसँगै नेपाल–भारत विद्युत् व्यापारमा थप सहजता आएको हो ।
यसअघि भारतले नेपालबाट १,०१०.९ मेगावाट विद्युत् खरिदको अनुमति दिइसकेको थियो । पछिल्लो सहमतिपछि कुल निर्यात क्षमता १,०९०.९ मेगावाट पुगेको छ ।
साथै, बंगलादेशलाई निर्यात गर्न स्वीकृत ४० मेगावाट समेत जोड्दा नेपालको कुल विद्युत् निर्यात स्वीकृति १,१३०.९ मेगावाट पुगेको हो ।
सरकारी स्रोतका अनुसार भारतले यसअघि श्रावण २६ गते २०० मेगावाट विद्युत् निर्यातको स्वीकृति दिएको थियो । त्यस्तै, बिहीवार थप ८० मेगावाट विद्युत् निर्यातको स्वीकृति दिएको हो ।
यो अनुमति दोहोरो सम्झौताअन्तर्गत मध्यम अवधिको लागि दिइएको हो, जसअनुसार निर्यात अवधि सन् २०२५ अगस्ट २१ देखि सन् २०२६ अक्टोबर ३१ सम्म रहनेछ ।
भारतले स्वीकृति दिएको ८० मेगावाट मध्ये ४८.५ मेगावाट मेवा खोला जलविद्युत् आयोजना र ३१.०४ मेगावाट करुवा सेती हाइड्रोपावर आयोजना अन्तर्गत पर्दछ । यी परियोजनाबाट उत्पादित विद्युत् भारतको विद्युत् बजारमा निर्यात गरिनेछ ।
विद्युत् निर्यात क्षमतामा निरन्तर भइरहेको विस्तारलाई नेपालका ऊर्जा विज्ञहरूले सकारात्मक संकेतका रूपमा लिएका छन् ।
उनका अनुसार यसले नेपालमा उत्पादित विद्युत् अन्तर्राष्ट्रिय बजारमा विस्तार हुने र आन्तरिक मागभन्दा बढी उत्पादनलाई वैदेशिक बजारमा उपयोग गर्न सकिने अवसर प्रदान गर्नेछ ।
